CHANZO CHA WATOTO WA MITAANI NI...

ASASI ya Woman and Children Group wilayani Kilombero imebaini ongezeko la watoto mitaani wanaoishi katika mazingira magumu wilayani humo ambalo limechochewa na matatizo mbalimbali ikiwemo uporaji wa mali za marehemu.

Akizungumza katika mafunzo ya siku 10 yaliyotolewa kwa wazazi, walezi, wajumbe wa kamati za shule na viongozi wa serikali kuanzia vitongoji hadi kata yaliyoandaliwa na asasi hiyo kwa ushirikiano na ‘Foundation for Civil Society’ katika kata ya Kibaoni na Mikelo wilayani humo.

Mratibu wa mradi huo Evenita Chamanga alitaja sababu mbalimbali zinazochangia kuwepo kwa watoto wa mitaani kuwa ni pamoja na uporaji wa mali za marehemu, ugumu wa maisha na elimu duni ya sheria ya mirathi.

Chamanga, alisema kuwa mbali na changamoto hizo pia mila potofu, umaskini na uzazi usio wa mpangilio ni miongoni mwa sababu zilizobainika kuongeza tatizo hilo kwa kasi kubwa.

Alisema hatua hiyo imesababisha watoto hao kujishughulisha na ajira mbaya za utotoni ikiwemo kukimbilia mijini na kufanya kazi za majumbani, ongezeko la utoro mashuleni na kutojua kusoma kuandika.

“Sheria imeng’ang’ania maelekezo ya dini, mila na desturi bila kujali ni nani anaumia zaidi hasa baada ya mmoja kufariki…hapa sheria ingefafanua kabisa kuwa mmoja anapofariki msimamizi au mmiliki atakuwa nani…sasa unakuta mila na desturi nyingine zinakataa mmoja kumiliki mali,” alisema.

Aidha waliiomba serikali kutoa mafunzo zaidi ya haki za watoto, wajane na ndugu wengine katika jamii ili kupunguza ongezeko la umaskini na makundi yasiyo rasimi mitaani kutokana na kuonekana kudhulumiwa haki zao.

Kwa hisani ya Tanzania Daima