Aliyetorosha twiga hai mbaroni

MTUHUMIWA Mkuu wa kashfa kubwa iliyowahi kuitingisha nchi na Wizara ya Maliasili na Utalii ya kusafirisha wanyama hai wapatao 130 nje ya nchi, Kamran Ahmed (30), anashikiliwa na Polisi mkoani Arusha kwa tuhuma za kukutwa na fedha bandia kiasi cha shilingi milioni 18.

Tukio la kumatwa kwa mtuhumiwa huyo limetokea Alhamisi ya wiki iliyopita katika eneo la Mto Nduruma, barabara kuu ya Arusha-Moshi majira ya saa za nane mchana baada ya Polisi kusimamisha gari alilokuwa akisafiria mtuhumiwa huyo na kulipekua. Kamran anatuhumiwa na wenzake wapatao sita kuwa walihusika na njama za kusafirisha wanyama hai 130 wa aina 14 tofauti wakiwemo twiga wanne na wanakabiliwa na kesi ya jina namba 4 ya mwaka 2011 katika Mahakama ya Hakimu Mkazi mkoani Kilimanjaro.

Kesi hiyo ambayo inasuasua kwa mara mwisho ilitajwa Septemba 4 mwaka huu na imeahirishwa hadi Oktoba 22 mwaka huu ambapo itatajwa tena kutokana na kile ambacho waendesha mashitaka wanadai kuwa upelelezi wake haujakamilika. Lakini katika tukio la wiki iliyopita, kwa mujibu wa taarifa ya Kamanda wa Polisi Mkoa wa Arusha, Liberatus Sabas, Kamran alitiwa mbaroni akiwa na mtuhumiwa mwingine Nick Joseph mkazi Kijenge Mwanama katika Manispaa ya Arusha. Polisi walichukua hatua hiyo baada ya kupewa taarifa na raia wema kuhusu fedha hizo ambazo taarifa zinaeleza kuwa zimetengenezwa nchini Kenya na ziliingizwa nchini kupitia mpaka wa Namanga.

Kwa mujibu Kamanda huyo watuhumiwa hao wawili walikuwa wanasafiri kwa kutumia gari aina ya Toyota Mark II lenye namba za usajili T512 BVG na walikuwa wanaelekea Moshi mkoani Kilimanjaro kuzifanyia biashara fedha hizo bandia. Alieleza kuwa Polisi baada ya kuwakamata watuhumiwa hao na kuwapekua walikutwa na fedha hizo bandia zikiwa ndani ya boksi dogo likiwa limehifadhiwa chini ya kiti cha dereva. Hadi Jumatatu watuhumiwa hao walikuwa bado wanashilikiwa katika Kituo Kikuu cha Polisi cha kati kwa ajili ya mahojiano na makachero wa Polisi na walitarajiwa kufikishwa mahakamani baada ya kukamilika kwa mahojiano hayo. Kwa muda mrefu mtuhumiwa huyo amekuwa akiishi nchini na kufanya shughuli zake katika miji ya Arusha na Moshi na taarifa zinaeleza kuwa ana kibali cha kazi daraja A ambacho hutolewa kwa wawekezaji wakubwa.

Taarifa za utoroshaji wa wanyama na tuhuma zinazomkabili Kamran zilifichuliwa na gazeti la Raia Mwema kwa mara ya kwanza Mei mwaka jana huku uhalifu ukielezwa kufanyika Novemba 26 mwaka juzi ambapo wanyama hao walisafirishwa kwa kutumia ndege kubwa ya Jeshi la Qatar na taarifa zilidai kuwa walipelekwa katika mji wa Doha nchini humo.

Sambamba na wanyama hao hai ndege hiyo ya Jeshi la Qatar pia ilisafirisha shehena ya nyama zilizokaushwa ambazo zilitokana na wanyama waliouawa kijangili katika mapori mbalimbali ya akiba katika mikoa ya Kanda ya Kaskazini. Kashfa hiyo pia ilimgarimu Mkurugenzi wa Idara ya Wanyamapori nchini Obeid Mbagwa na maofisa wengine wa idara hiyo ambao walifukuzwa kazi hivi karibuni na Waziri wa Maliasili na Utalii, Balozi Khamis Kagasheki.